काठमाडौं — काठमाडौं महानगरपालिकाले शैक्षिक सत्र २०८२ का कक्षा ८ उत्तीर्ण परीक्षाका लागि ५७ परीक्षा केन्द्र तोकेको छ। परीक्षा चैत ५ गतेदेखि सञ्चालन हुनेछ।
यस वर्ष ४९४ विद्यालयका १९ हजार ११७ जना विद्यार्थी परीक्षामा सहभागी हुँदैछन्, जसमा १० हजार ७४५ जना छात्र र ८ हजार ३७२ जना छात्रा छन्। विद्यार्थी विद्यालयको प्रकार अनुसार सामुदायिक, वैकल्पिक, धार्मिक र संस्थागत विद्यालयबाट सहभागी हुँदैछन्।
परीक्षा केन्द्र ४७ सामुदायिक र १० संस्थागत विद्यालयमा कायम गरिएको छ। अटिजम भएका वा लेखन सहयोग आवश्यक विद्यार्थीका लागि होम सेन्टरमा प्रश्नपत्र पठाएर परीक्षा लिन व्यवस्था गरिएको छ।
केन्द्राध्यक्ष विद्यालयका प्रधानाध्यापक वा वरिष्ठ शिक्षक नियुक्त हुनेछन्। परीक्षा संचालनका लागि केन्द्र तयारी, उत्तरपुस्तिका कोडिङ र परीक्षक अभिमुखीकरण समेत गरिनेछ।
