नेपाल राष्ट्र बैंकको डेपुटी गभर्नरको पद दुई सातादेखि रिक्त रहेको छ। फागुन २५ गते नीलम ढुंगाना र बमबहादुर मिश्रको अवकाशपछि पद खाली भएको हो। सरकारले नियुक्तिमा चासो देखाए पनि आन्तरिक राजनीतिक कारणले नियुक्ति प्रक्रिया लम्बिएको छ। राष्ट्र बैंकका स्रोतका अनुसार, डेपुटी गभर्नरको नियुक्ति नहुनुका कारण बैंकको नीतिगत निर्णय र प्रशासनमा असर परेको छ। गभर्नर विश्व पौडेलले कार्यकारी निर्देशकहरूबाट सिफारिस गरेको नाम मन्त्रिमण्डलमा पठाउनुपर्ने कानुनी व्यवस्था छ।