काठमाडौं । किराँत समुदायको महत्वपूर्ण सांस्कृतिक पर्व उभौली आज देशभर श्रद्धा र उत्साहका साथ मनाइँदैछ। वैशाख शुक्ल पूर्णिमामा मनाइने यस पर्वले प्रकृतिप्रतिको आस्था, पुर्खाप्रतिको सम्मान र कृषि जीवनको सुरुवातलाई संकेत गर्छ।
‘उँभो लाग्ने’ अर्थात् बेँसीबाट लेकतर्फ सर्ने परम्परासँग जोडिएको उभौलीले प्राकृतिक चक्र र मानव जीवनबीचको सम्बन्धलाई झल्काउँछ। बाली रोप्नुअघि भूमिपूजा गरी समृद्धि र राम्रो उत्पादनको कामना गरिन्छ।
पर्वको मुख्य आकर्षण साकेला सिली नाच हो, जसले प्रकृति, कृषि र सामाजिक जीवनलाई लयबद्ध रूपमा प्रस्तुत गर्छ। देशका विभिन्न स्थानमा पूजा, नाचगान र सांस्कृतिक कार्यक्रम गरी यो पर्व मनाउने परम्परा रहेको छ।
उभौलीले धार्मिक विश्वाससँगै वातावरण संरक्षण र प्रकृतिसँग सहअस्तित्वको सन्देश पनि दिँदै आएको छ।
