काठमाडौं । विश्व स्वास्थ्य संगठन (World Health Organization) ले प्रजातान्त्रिक गणतन्त्र कंगोमा फैलिएको इबोला प्रकोपलाई “अन्तर्राष्ट्रिय चासोको सार्वजनिक स्वास्थ्य आपतकाल” घोषणा गरेको छ।
संस्थाका अनुसार पूर्वी इटुरी प्रान्तमा फैलिएको प्रकोपमा करिब २४६ जना संदिग्ध संक्रमित र ८० जनाको मृत्यु भएको रिपोर्ट छ। नयाँ प्रकोप “बुन्डिबुग्यो भाइरस” का कारण भएको बताइएको छ, जसका लागि हालसम्म कुनै स्वीकृत खोप वा उपचार उपलब्ध छैन।
डब्ल्यूएचओले संक्रमणको वास्तविक दायरा अझै स्पष्ट नभएको भन्दै निगरानी, कन्ट्याक्ट ट्रेसिङ र आइसोलेसनलाई तीव्र बनाउन सम्बन्धित देशहरूलाई आग्रह गरेको छ।
संक्रमण कंगोका सीमावर्ती क्षेत्र हुँदै युगान्डासम्म फैलिएको पुष्टि भएको छ, जसले थप जोखिम बढाएको बताइएको छ। डब्ल्यूएचओले भने यात्रा वा व्यापार प्रतिबन्ध लगाउनुपर्ने आवश्यकता नरहेको स्पष्ट पारेको छ।
