काठमाडौँ — पश्चिम एसियामा चर्किरहेको युद्धका कारण कामदार कम्पनीहरूले नेपाली कर्मचारीलाई “आफ्नै देश फर्क” भन्न थालेका छन्। युएई, साउदी अरब, कतार, कुवेत, बहराइन, ओमान, इराक लगायतका देशमा आतिथ्य, सेवा र निर्माण क्षेत्रमा कार्यरत नेपालीहरूले रोजगारी गुमाउने जोखिम बढेको छ।
परराष्ट्र मन्त्रालयका अनुसार पश्चिम एसियामा १७ लाखभन्दा बढी नेपाली कार्यरत छन्। युएईमा सबैभन्दा धेरै सात लाख नेपाली छन्। हालसम्म इरान–इजरायल युद्धमा परी २८ जना घाइते र एकको मृत्यु भइसकेको छ।
नेपाल सरकारले परिस्थितिको मूल्यांकन गर्न उच्चस्तरीय अन्तर–मन्त्रालय कार्यदल गठन गरेको छ। कार्यदल सात दिनभित्र पश्चिम एसियाको वर्तमान स्थिति र यसले नेपालमा पार्ने प्रभावको प्रतिवेदन पेश गर्नेछ।
