खाडी तथा पश्चिम एसियाका १२ देशमा रोकिएको वैदेशिक रोजगारी पुनः खुलेसँगै विदेशिनेको संख्या तीव्र रूपमा बढेको छ। श्रम स्वीकृति खुलेको पहिलो दुई दिनमै ५ हजार ७३० जनाले अनुमति लिएका छन्।
यसमध्ये ३ हजार ४८३ जना खाडी र पश्चिम एसियाली मुलुकतर्फ गएका छन्। पहिलो दिन २,७३४ र दोस्रो दिन २,९९६ जनाले श्रम स्वीकृति लिएका हुन्।
इजरायल–इरान तनावका कारण केही समय रोकिएको प्रक्रिया युद्धविरामपछि पुनः सुरु गरिएको हो। श्रम मन्त्रालयले १२ देशमा रोकिएको स्वीकृति वैशाख ७ गतेदेखि फेरि खुला गरेको थियो।
चालु आर्थिक वर्षको चैत मसान्तसम्म ५ लाख ८७ हजारभन्दा बढी नेपालीले वैदेशिक रोजगारका लागि श्रम स्वीकृति लिएका छन्।
