डोलप्रसाद अर्याल ले सरकारी काम ढिलो हुँदा जनताले पाउने लाभ पनि ढिलो हुने बताएका छन्। उनले विकास, समृद्धि र जनसन्तुष्टि कुनै पनि हालतमा ढिलाइ नगरी छिटो उपलब्ध गराउनुपर्नेमा जोड दिए। धादिङको ज्वालामुखी गाउँपालिकालाई नमुना र स्वच्छ गाउँ घोषणा कार्यक्रममा गृहजिल्ला पुगेका सभामुख अर्यालले पत्रकारसँग कुरा गर्दै कानुन निर्माण र संशोधनलाई “फास्ट ट्र्याक” मा अघि बढाइने बताए। उनले तीन तहका सरकारबीच समन्वय गर्दै कानुन नबाझिने व्यवस्था मिलाइने पनि उल्लेख गरे। उनले जिल्लाको विकाससँग जोडिएको बुढीगण्डकी आयोजनाको काम छिट्टै अघि बढ्ने आश्वासनसमेत दिएका छन्।