काठमाडौं — नेपाल उद्योग वाणिज्य महासंघको ६० औँ वार्षिक साधारणसभाअन्तर्गत आज नयाँ कार्यसमिति चयनका लागि मतदान भइरहेको छ। नेपाल प्रज्ञा प्रतिष्ठानमा जारी निर्वाचनमा ७३ पदका लागि १३७ उम्मेदवार प्रतिस्पर्धामा छन्।
यसअघि उच्च अदालत पाटनको अन्तरिम आदेशका कारण स्थगित भएको निर्वाचन यसपटक नयाँ मितिमा सञ्चालन गरिएको हो। सोमबार उद्घाटन सत्र सम्पन्न भएपछि मंगलबार मतदान प्रक्रिया अघि बढाइएको हो।
संशोधित विधानअनुसार अध्यक्ष र वरिष्ठ उपाध्यक्ष प्रत्यक्ष निर्वाचनबाट चयन हुँदैनन्। यसपटक वरिष्ठ उपाध्यक्ष अञ्जन श्रेष्ठ भावी अध्यक्षका रूपमा अघि बढ्ने निश्चित जस्तै देखिएको छ।
जिल्ला–नगर, वस्तुगत र एसोसिएट समूहका प्रतिनिधिहरूबीच उपाध्यक्ष र कार्यसमिति सदस्य पदका लागि प्रतिस्पर्धा भइरहेको छ। महिला उपाध्यक्ष र कोषाध्यक्ष पदमा छुट्टै मतदान प्रक्रिया अपनाइएको छ।
भावी अध्यक्षका रूपमा अघि बढिरहेका श्रेष्ठले निजी क्षेत्रको मनोबल बढाउने, लगानीमैत्री वातावरण निर्माण गर्ने र अर्थतन्त्र सुदृढ गर्ने लक्ष्य प्रस्तुत गरेका छन्।
