जनकपुरधाम, वैशाख ३ – धनुषाको सबैला नगरपालिका-१२ का पूर्ववडाध्यक्ष प्रदिप महतोको शव हत्या गरिएको आशंकामा फेला परेको छ। बुधबार राति गणेशमान चारनाथ नगरपालिका-९ स्थित कमला सिँचाइको पुलमा महतोको शव भेटिएको हो।

प्रहरीले घटनास्थलमा १०-१२ वटा बियर र अन्य मादक पदार्थका खाली बोतलहरू पाएका छन्। महतोसहित एक समूहले मदिरा सेवन गरेको अनुमान गरिएको छ। प्रारम्भिक छानबिनमा उनको शवमा चोटपटक देखिएको र हत्या भएको संकेत गरेको प्रहरीले जनाएको छ।

पोस्टमार्टम रिपोर्टको आधारमा वास्तविक कारण पत्ता लगाइनेछ, र फरार रहेका मदिरासँगै भएका व्यक्तिहरूको खोजी जारी छ।